Khaana Saamne Rakh Kar Fatiha Padhna



Sawal:Fatiha karna aur usme khaana wagairah saamne rakhna kaisa hai?
Jawab:Fatiha,Isaal-e-Sawab ki ek surat hai,Jis me Quran sharif ki kuchh suraten,Aayaten aur darood sharif wagairah padh kar,Allah Ta’ala se dua ki jaati hai. Aur isaal-e-sawab ky jaaiz hone me koi shak nahi,Kyunki iske baare me bahut saari hadisen hain.Un me se kuchh ye hain:
Hadis No.1:Hazrat-e-Aaisha radhi allaho anha bayan karti hain ki ek shakhs ne Huzur Nabi kareem Sallallaho alaihe wasallam se arz kiya: Ya Rasoolallah Sallallaho alaihe wasallam!Meri maa achanak inteqal kar gayi hai.Mera khayal hai ki agar unhein apne aakheri waqt mein kuchh bolne ka mauqa milta to woh sadqa karti.Ab agar main un ki taraf se sadqa karon to kiya is ka sawab unhein pahuchega?Aap Sallallaho alaihe wasallam ne farmaya ki Haan.(Sahi Bukhari,Hadis No.1322.Sahi Muslim,Hadis No.1004.Abu’dawood,Hadis No.2881)
Hadis No.2:Hazrat-e-Bureeda radhi allaho anho bayan karte hain ki main Huzur Sallallaho alaihe wasallam ki baargah me baitha houa tha.Ek aurat aayi aur arz ki:Main ne apni maa ko ek baandi sadqa me di thi aur ab meri maa ka inteqal hogaya hai.Aap Sallallaho alaihe wasallam ne farmaya ki:Tumhen sawab mil gaya aur warasat ne woh baandi tumhe lauta di.Us aurat ne arz kiya: Ya Rasoolallah Sallallaho alaihe wasallam!Meri maa par ek mahine ke roze baaqi the, kiya main un ki taraf se roze rakhon?Aap Sallallaho alaihe wasallam ne farmaya ki:Haan!us ki taraf se roze rakho.Us ne arz kiya:Meri maa ne haj kabhi nahi kiya tha kiya main un ki taraf se haj ada kar lun?Aap Sallallaho alaihe wasallam ne farmaya ki:Haan!us ki taraf se Haj bhi ada karlo.(Sahi Muslim,Hadis No.1149.Tirmizi,Hadis No.667)
Hadis No.3:Hazrat-e-Sa’ad bin Ubada radhi allaho anho se riwayat hai ki:Un ki walida ka inteqal houa to unhone Huzur Sallallaho alaihe wasallam se arz kiya: Ya Rasoolallah Sallallaho alaihe wasallam! Meri walida inteqal kar gayi hai,To kiya main un ki taraf se sadqa kar sakta hun?Aap Sallallaho alaihe wasallam ne farmaya ki Haan.unhone arz kiya:To kaunsa sadqa karna ziyadah behtar rahega?Aap Sallallaho alaihe wasallam ne farmaya ki:Paani.To Madina sharif me ye Sa’ad ki maa ke paani ki sabil hai.(Sunan Nasa’ee,Hadis No.3662.3666.Ibn-e-Maja,Hadis No.3684)
In hadiso se maalom houa ki koi bhi nek kaam kar ke uska sawab mayyat ko pahunchaana bilkul jaaiz-o-durust hai.
Rahi baat khaana saamne rakh kar padhne ki to isme bhi koi harj nahi hai.Hadees sharif me hai jang-e-khandaq ke mauqe par jab hazrat Umme Sulaim ke ghar Huzur Sallallahu alaihe wasallam sahaaba ke saath khaane gaye.To khaana bahut kam tha,Hazrat Umme Sulaim ne Rotiya Aap Sallallahu alaihe wasallam ke saamne rakh di,Phir Nabi Sallallahu alaihe wasallam ke hukm se un rotiyo ko choor choor kar diya gaya,Aur Kuppi nichor kar us par kuchh ghee daal diya gaya.Phir Aap Sallallahu alaihe wasallam ne us par jo kuchh Allah ne chaaha padha.To Allah Ta’ala ne us khaane me itni barkat di ki saare sahaaba pet bhar kar khaa liye. [Bukhari,Hadees No.3578]
Is hadees sharif se maloom hua ki khaana saamne rakh kar padhne me koi harj nahi hai,Balki barkat ka zariya hai.
Kuchh log ye samajhte hain ki khaana saamne rakh kar padhne se khaana najaaiz ho jaata hai,Ye bilkul galat khayal hai jiski koi haqiqi bunyaad nahi hai. Fatiha ke baare me Hazrat shah Abdul Aziz Mohaddis dehlawi likhte hain ki “Woh khaana jis ka isaal-e-sawab karna hai,Us par Fatiha,Qul aur darood sharif padhna barkat ka zariya hai aur uska khaana bahut achchha hai.[Fatawa Azizi,Vol:1,Page No.48]
Aur farmate hain ki: Agar Malida aur chaawal ki kheer kisi buzurg ki fatiha ke liye isaal-e-sawab ki niyat se paka kar khilaaya jaae to ye jaaiz hai,Isme koi harj nahi.[ Fatawa Azizi, Vol:1,Page No.50] Haji imdadulaah muhajir makki ne bhi apni kitab “Faisla Haft Mas’ala” me is ke baare me tafseel se likh kar ise jaaiz aur mostahab qaraar diya hai.[ Ba-hawala,Fatawa Faqih-e-Millat,Jild 1,Page No.278.288]
Wallahu A’lamu bis-sawab.
Share........




Related Topics



Ghar Me Buzurgo Ki Tasweer Rakhna Kaisa Hai? Peer Ke Qadam Par Sar Rakhna Kaisa Hai? Kya Har Milaad Ki Mehfil Me Huzur Aate Hain? Shab-e-Baraat Me Fatiha,Halwe Hi Par Kyun? Gair Sahaabi Ke Liye "Radhi Allaho Anho" Likhna Kaisa Hai? Auraten Mazaar Par Jaa Sakti Hain? Kya Parindo Ko Pinjare Me Qaid Karna Jaaiz Hai?



Dawat-E-Quran