Rishtedaar aur Seerat-e-Mustafa ﷺ



Aj ke daur me ek rishtedaar daulat ke bahut ziyadah hone ki wajah se shandaar se shaandaar mahal me aish ki zindagi guzaar raha hai.Un ke bachche dunya ki behtarin se behtarin kapde pahan rahe hain.Ek se badh kar ek khaane khaa rahe hain aur dunya ki har aish aur aaram wali chiz se lutf utha rahe hain jab ki un ki nazron ke saamne un ke rishtedaar bhok se bilak rahe hain.Aur un ke bachche faaqe karne par majbur nazar aa rahe hain.Un ke badan par normal libaas bhi nazar nahi aa raha hai.Us ke baad bhi un ke dil me rahm o karam ka koi jazba nazar nahi aata.Balki kabhi kabhi un ki garibi aur muflesi ki wajah se un se rishta kaata jaata hai aur qaribi se qaribi hone ke baad bhi pahchaan ne tak se inkaar kar diya jaata hai.Jis ki wajah se hamare socity me bahut saare log taklif aur musibat ki is maar se karaah rahe hain.
Aisi haalat me hamare socity ko in taklifo se agar koi nikaal sakta hai to woh huzur ﷺ ki paakiza seerat aur aap ki behtarin taalim hai. Is liye yahan par rishtedaaro ke baare me aap ﷺ ki seerat aur aap ki paakiza taalimat pesh ki jaati hain.
Rishtedaaro ke saath Aap ﷺ ki hamdardiya: Aap ﷺ ke chacha Abu Talib apne dusre bhaiyo ki tarah khush haal nahi the.Aksar tangi ka saamna rahta tha.Makka me jab Qahat pada to is se un ki maali haalat aur kamzor ho gayi.Aap ﷺ ko un ki ye taklif nahi dekhi gayi to Aap ne apne chacha Hazrat-e-Abbas radhi allaho anho ke paas gaye aur unhe is baat par ubhara ki ham logo ko mil kar janab-e-Abu Talib ka bojh baant lena chaahiye.Un ke ek bete ki parwarish ki zimmedari main le leta hun aur ek ki aap le lijiye.Is tarah un ka bojh halka ho jaaega.Phir aap ﷺ aur hazrate Abbas,Abu Talib ke paas gaye aur un se apne aane ka maqsad bayan kiya.Abu Talib ke 4 bete the. Talib, Aqeel, Zaafar aur Ali.Unhone kaha ki Talib aur Aqeel ko mere paas rahne dijiye aur baaqi ke baare me aap logo ki jo marzi ho Karen.To Huzur ﷺ ne Hazrat-e-Ali ko le liya jo sab se chhote the aur Hazrat-e-Zaafar ko Hazrat-e-Abbas ne le liya.(Ziyaun Nabi,Vol:2,Page No.229-230)
Is tarah se aap ne apne chacha ka sahara bane aur un ka bojh halka kiya.In ke elawah Aap ke aur bhi jo rishtedaar the aap un ki zindagi bhar khair khaahi karte rahe.Yahan tak ki jo doodh ke rishte se bhi aap ke rishtedaar the un ka bhi khayal farmate rahe.Jaisa ki ek baar jab Qahat hui to aap ﷺ ne doodh ke rishte se lagne wale maa baap ko 40 bakriya aur ek oont ata farmaya.Aur apni ummat ko bhi yahi taalim diya.Yahan par un me se kuchh pesh kiya jaata hai.
(1)Hazrat-e-Abu Huraira radhi allaho anho bayan karte hain ki:Huzur ﷺ ne irshad farmaya ki:Raham(Yani Rishta)Rahman se nikla hai. Aur Allah Ta’ala ne rishte ke baare me farmaya ki:Jo tujhe milaaega main use milaunga aur jo tujhe kaatega main use kaatunga. (Sahi Bukhari,Hadis No.5988)
(2)Hazrat e Abu huraira radhi allaho ta’ala anho bayan karte hain ki maine Rasoolallah sallallaho alihe wasallam se arz kiya :Ya Rasoolallah sallallaho alaihe wasallam!Mujhe aise kaam bataeye ki agar main usko karon to jannat dakhil ho jaaun. Aap sallallaho alaihe wasallam ne farmaya:Salaam ko phailao, khana khilao,aur rishtadaro ke saath achhchha sulook karo aur raat me jab log so jaae to uth kar namaaz padho to salaamati ke saath jannat me dakhil ho jaoge.(Al-Mustadrak,hadis No.7278)
(3)Hazrat e Aasim radhi allaho ta’ala anho bayan karte hain ki: Rasoolallah sallallaho alaihe wasallam ne irshad farmaya:Jis ko ye pasand ho ki uski umr me darazi (yani barkat ho) aur rizq me kushadgi ho aur buri maut se mahfuz rahe, woh Allah se darta rahe aur rishtadaro ke saath achhchha sulook kare.( Bukhari, hadis No.5985.Al-Mustadrak,hadis No.7280)
(4)Hazrat e Abdullah bin Umr radhi allaho ta’ala anhuma se riwayat hai ki: Rasoolallah Sallallahu alaihe wasallam ne irshad farmaya: achhchha sulook iska naam nahi ki badla diya jaae,yani us ne uske saath ehsan kiya to usne bhi uske saath kardiya balke achhchha sulook karne wala woh hai ke udhar se kaata jaata ho lekin phir bhi ye jodta ho.(Bukhari,hadis No.5991.Muslim,hadis No.2908)
(5)Hazrat-e-Jubair bin Mutim radhi allaho anho bayan karte hain ki: Huzur ﷺ ne irshad farmaya ki:Rishta kaatne wala jannat me nahi jaaega.
(6)Hazrat-e-Abdullah bin Abbas radhi allaho anhuma bayan karte hain ki: Huzur ﷺ ne irshad farmaya ki:Apne nasab ko pahchano taki un ke saath achhchha sulook kar sako.Kyunki agar rishte ko kata jaae to agarche qarib ho woh qarib nahi hai.Aur agar joda jaae to door nahi hai agarche door ho.(Al-Mustadark,Hadis No.7283)
Huzur Sallallaho alaihe wasallam ke in taalimat par amal kiye begair ham kabhi bhi apne socity ko ek achhchha socity nahi bana sakte.Is liye ham sab par zaruri hai ki huzur ki seerat aur taalim par amal kare aur apne rishtedaro ke saath behtarin sulook kare kyunki isi me hamari dunya aur aakherat ki kaamyabi hai.
Share.........




Related Topics



Beta aur Seerat-e-Mustafa ﷺ Baap aur Seerat-e-Mustafa ﷺ Shauhar aur Seerat-e-Mustafa ﷺ Malik aur Seerat-e-Mustafa ﷺ Bhai aur Seerat-e-Mustafa ﷺ Padosi aur Seerat-e-Mustafa ﷺ Garibo ki madad aur Seerat-e-Mustafa ﷺ Business aur Seerat-e-Mustafa ﷺ



Dawat-E-Quran