Namaz deen-e-islam ke bunyadi arkaan me se hai.Allah aur uske Rasool Sallallaho alaihe wasallam par iman ke baad aham tareen ibaadat hai.Iski ahmiyat aur fazilat ka andaza is se lagaya jaa sakta hai ki Quran Majeed me taqriban 700 jagah par namaz ka zikr aaya hai.Kuchh aayaten ye hain:
Aur meri yaad ke liye namaz qaayam karo.[Surah Taaha,Aayat No:14]
Aye iman walo!Sabr aur Namaz se madad chaaho,Beshak Allah sabr karne walo ke saath hai.[Surah Baqra,Aayat No.153]
Beshak jo log imaan laaye aur nek amal kiye aur namaz qaayam rakha aur zakat dete rahe,Unke liye unke Rab ke paas unka ajar hai aur un par (Aakhirat me) nahi koi dar hoga aur nahi woh gamgeen honge.[Surah Baqra,Aayat No.277]
Beshak kaamyab ho gaye woh iman wale jo apni namaz me khushu ekhtiyar karte hain.[Surah Momenoon,Aayat No.1,2]
Hazrat-e-Isa alaihissalam ne kaha:
Aur mere Rab ne mujhe namaz aur zakat ki taakid kiya jab tak main zinda rahun.[Surah Maryam,Aayat No.31]
Surah Modassir me hai,Jab jahannamiyo se puchha jaayega ki tum jahannam me kis wajah se pahunche,To woh jawab dete hue kahenge:
Ham namaz padhne walo me se nahi the,Aur ham mohtaaj logo ko khaana nahi khilaate the,Aur behuda kaam karne walo ke saath behuda kaamo me lage rahte the.[Surah Modassir,Aayat No.43,44,45]
Hadees sharif me bhi iski badi taakid,Fazilat aur chhorne par azaab bayan kiya gaya hai,Un me se kuchh ye hain.
Hadees No.1: Huzur Sallallaho alaihe wasallam ne farmaya: Islam ki bunyad 5 chizon par hai.Allah Ta’ala ki ibaadat karna aur uske siwa sab ki ibaadat ka inkaar karna.Namaz qaayam karna.Zakaat ada karna.Allah ke ghar ka haj karna aur Ramza ke roze rakhna.[Sahih Muslim,Hadees No.16]
Hadees No.2: Huzur Sallallaho alaihe wasallam ne farmaya ki: Allah Ta’ala ne 5 namazen farz kiya hai,Jis ne un namazo ke liye achchhi tarah se wazu kiya aur unke waqt par unko ada kiya,Uske ruku ko puri tarah se ada kiya aur khushu ekhtiyar kiya,To Allah Ta’ala ne uski bakhshish ka wada farmaya hai. Aur jo ye sab nahi kare uske liye koi wada nahi hai chaahe to bakhsh de aur chaahe to azaab de.[Abu Dawood,Hadees No.425]
Hadees No.3: Hazrate Abdullah bin Mas’ood radhi allaho anho bayan karte hain ki main ne Huzur Sallallaho alaihe wasallam se arz kiya:Allah Ta’ala ko sab se ziyadah kaun sa amal mahboob hai? To Aap Sallallaho alaihe wasallam ne farmaya:Namaz ko uske waqt par padhna.[Sahih Muslim,Hadees No.85]
Hadees No.4: Hazrate Abu Zar radhi Allaho anho bayan karte hain ki: Huzur Sallallaho alaihe wasallam Thandi ke mausam me,Jab darkht se patte jharte hain,Baahar nikle aur Aap ne ek darkht ki do tehni ko pakar liya,To patte jharne lage.(Hazrate Abu Zar kahte hain) Huzur Sallallaho alaihe wasallam ne pukaara Aye Abu Zar! Main ne arz kiya Labbaik Ya Rasoolallah ! Tab Huzur Sallallaho alaihe wasallam ne farmaya:Musalman banda jab namaz is maqsad se padhta hai ki use Allah ki riza haasil ho jaaye to uske gunaah isi tarah jharte hain jis tarah is darkht se patte jhar rahe hain.[Masnad Ahmad,Hadees No. 21596]
Hadees No.5: Hazrate Abu hurairah radhi Allaho anho bayan karte hain ki: Huzur Sallallaho alaihe wasallam ne farmaya: Bataao! Agar tum me se kisi ke darwaaze par nahar ho aur woh usme har din 5 martabah gusal karta ho,To kya uske jism par kuchh bhi mail baaqi rahega? Sahaba ne arz kiya:Uske jism par kuchh bhi mail baaqi nahi rahega.Aaqa kareem Sallallaho alaihe wasallam ne farmaya:Yahi misaal hai 5 namazo ki,Allah Ta’ala iske zariye bando ke gunaaho ko mita deta hai.[Sahih Bukhari,Hadees No.528]
Hadees No.6: Hazrate Abu hurairah radhi Allaho anho bayan karte hain ki: Huzur Sallallaho alaihe wasallam ne farmaya: Qayamat ke din sab se pahle namaz ka hisaab hoga.Agar namaz, Sharaayat, Arkaan aur waqt ke mutaabiq ada ki gayi hogi,To woh shakhs nijaat aur chhutkaara paayega aur maqsad haasil karega.[Sunan Nisaayi,Hadees No.465]
Namaz ki ahmiyat is qadar ziyadah ki Huzur Sallallaho alaihe wasallam ne apne wisaal ke waqt ummat ko jin chizon ki wasiyat farmaya unme sab se ziyadah taakid namaz ki farmaayi.Hazrate Maula Ali radhi Allaho anho ki ek riwayat ke mutaabiq Aakheri Alfaaz jo Aap Sallallaho alaihe wasallam ki zuban-e-mubarak par baar baar aate the woh yahi the.Namaz ko laazim pakro, Namaz ko laazim pakro, Aur apne gulam aur londi ke baare me Allah Ta’ala se darte rahna.[Abu Dawood,Hadees No.5156]
Aur Hazrate Abdullah bin Umar radhi Allaho anhuma bayan karte hain ki:Ek din Huzur Nabi kareem Sallallaho alaihe wasallam ne namaz ka zikr kiya to irshad farmaya:Jis ne iski pabandi ki uske liye qayamat ke din Noor,Burhaan aur nijaat hogi aur jis ne uski pabandi nahi ki to uske liye nahi Noor hoga aur nahi Burhaan aur nijaat,Woh qayamat ke din Firaun,Qaroon, Hamaan aur Ubai bin Khalf ke saath hoga.[Masand Ahmad,Hadees No.6575]
Share.........

Related Topics

Namaz padhne ka tariqa Namaz ke sharayat wa faraaiz Namaz ke wajibaat aur sunnaten Namaz ke makruhaat aur mufsidaat Sajda sahu ke masaail Qiraat me galti ke masaail Musaafir ki namaz ka bayan Bimar shakhs ki namaz ka bayan Namaz-e-Taraweeh ke masaail Namaz Tahiyatul wazu aur Masjid Namaz-e-Ishraaq aur Chaasht Namaz-e-Tauba aur Tahajjud Salatut Tasbeeh Namaz-e-Hajat Namaz-e-Istikhaara Eid ki namaz Suraj gahan aur chand gahan ki namaz Namaz-e-Janaza ke masaail