Sawal: Namaz Padhne Ka Tariqa Kya Hai ?
Jawab:Namaz Padhne Ka Tariqa Yeh Hai Ke Ba Wazu Qiblah Rukh Ho Kar Dono Paaon Ke Panjon Me 4 Angul Ka Faasla Karke Ke Khada Ho

Aur Dono Haath Kaano Tak Le Jaae Ke Anghute Kaan Ke Lau Se Chhu Jaaen Is Haal Me Ke Hatheliyan Qiblah Rukh ho

Phir Niyat Karke Allahu Akbar Kehta Hua Haath Niche Laa kar Naaf Par Bandh Le Aur Sana Padhe.
“Subhanakallah Humma Wa Bihamdika Wa Tabarakasmuka Wa Ta'ala Jadduka Wa Laa ila'ha Ghairuk”

Phir Ta’ooz Yani A’auzu Billahi He Minash Shaitan Nir Rajeem Phir Tasmiya Yani Bismillah Hir Rahman Nir Rahim Padh Kar surah faatiha (Allhamdu Lillah) Padhe Phir koi surah ya 3 Chhoti Aayaten Ya Ek Badi Ayat Jo 3 Chhoti Ayaton Ke Bara Bar Ho. Us ke baad Allahu Akbar Kehta Hua Ruku Me Jaae Aur Ghutno Ko Haath Se Pakar Le Is Tarah Ke Hateliyan Ghutne Par Ho, Ungli Khub Phaili Hui Hon Peeth Bichhi Hui Ho Aur Sar Peeth Ke Barabar Ho, Uncha Nicha Na Ho

Aur Kam Se Kam 3 Bar Subhana Rabbi Yal Azeem Kahe Phir Sami Allahu liman Hamida Kehta Hua Seedha Khada Ho Jaae Aur Agar Akele Namaz Padh Raha Ho To Rabbana Lakal Hamd Kahe Phir Allahu Akbar Kahta Hua Sajdah Me Jaae Is Tarah Ke Pehle Ghutne Zameen Par Rakhe Phir Haath Phir Dono Haatho Ke Beech Me Naak Phir Peshani Rakhe Aur Naak Ki Haddi Zameen Par Jamaae Aur Baazuon Ko Kar Waton Aur Pait Ko Raano aur Pindliyon Se alag Rakhe Aur Dono Paaon Ki Sab Unguliyon Ke Pait Qiblah Rukh Jame Ho Aur Hatheliyan Bichhi Ho.Unguliyan Qiblah Ko ho

Aur Kam Se Kam 3 Bar Subhana Rabbiyal Aala Kahe Phir Sar Uthaae Aur Daahena Qadm Khada Karke Uski Unguliyan Qiblah Rukh Kare Aur Baayan Qadam Bichha Kar Uspe Khub Seedha Baith Jaae Aur Hatheliyan Bichha Kar Raano Par Ghutno Ke Paas Rakhe Phir Allahuakbar Kahta Hua Sajde Me Jaae Aur Pehle Ki Tarah Sajdah Karke Phir Sar Uthaae, Haath Ghutno Par Rakh Kar Panjon Ke Bal Khada Ho Jaae Ab Sirf Bismillah Hir Rahman Nir Rahim Padh Kar Qirat Shuru Kare Phir Pahle ki Tarah Ruku Sajdah Karke Baayan Qadam Bichha Kar Baith Jaae

Aur Tashahud Padhe.
“Attahiyyaatu Lillahi Was Salawato Wattayyibatu Assalamu Alaika Ayyuhannabi 'yo 'Warahmatullahi Wa barka'tuhu Assalamu Alaina Wa'ala'Ibadillahis Sa'liheen, Ash'hadu al La ilaha illallahu Wa Ash'hadu Anna Muhammadun Abd'uhu Wa Rasooluh”
Tashahud Padhte Hue Jab Kalma “La” Ke Qareeb Pahunche To Dahine Haath Ke Sahadat Ki Anguli Uthaae Aur “Ilah” Padhte Waqt Anguli Bichha De . Ab Agar 2 Se Zyada Rakaten Padhni Hai To Uth Khada Ho Aur Usi Tarah Padhe Magar Farzon Ki Un Rakaton Me Allhamd Ke Baad Surah Milaana Zaruri Nahi Ab Pichhla Qaaedah Jis Ke Baad Namaz Khatam Karega Usme Tashahud Ke Baad Darud-e-Ibrahim Padhe.
“Allahumma salli ala muhammadiw wa ala aali muhammadin kamaa sallaita ala ibrahima wa ala aali ibrahima innaka hamidum majid. Allahumma baarik ala muhammadiw wa ala aali muhammadin kamaa baarakta ala ibrahima wa ala aali ibrahima innaka hamidum majid”
Phir koi bhi Dua E Maasurah Padhe,Kuchh dua-e-Masurah ye hain.
1. Allahumma inni zalamtu nafsi zulman kathiran wa la ya'ghfirudh dhunooba illa anta fa'ghfir li ma'ghfiratan min ‘indika warhamni innaka antal ‘ghafurur rahim.
2.Allahumag Firi li Wali Wale Dayya wa liman tawaalada Wale Jamee'il Mu'mineena Wal Mu'meenat Wal Muslimeena Wal Muslimatil Ahya'e Minhum Wal Amwaat'e Innaka Mujeebud-Da'waat Birahmatika Ya Ar'hamarr'ahimeen.
3. Allahumma Rabbana Aatina Fid Duniya Hasanataw Wafil Akhirati Hasanataw Wa QinaAzaabanNaar.
Iske Baad Dahine kandhe Ki Taraf Munh Karke Assalam O Alaikum Wa Rahmatullah Kahe Phir Baaen Taraf Bhi Yahi Kahe

Ab Namaz Puri Ho Gayi. Iske baad Allah Ta’ala ki bargah me jis tarah se bhi dua kar sakte hon girya wazaari ke saath dua kar le kyuki farz namazon ke baad mangi gaee duaen Allah ﷻ ki barhag me jald qabool hoti hain.
Note: Ye tariqa jo bayan kiya gaya hai,Woh imam ya akele namaz padhne ka hai,Agar imam ke pichhe padhe to in me se kuchh baaten jaaiz nahi hai,Jaise imam ke pichhe Surah Fatiha ya Surah padhna.Kuchh Masaail me aurato ka bhi hukm alag hai,Jise aurato ki namaz me bayan kar diya gaya hai. Upar namaz ka jo tariqa bayan kiya gaya hai,Un me se kuchh baaten farz hain jin ke begair namaz bilkul nahi hoti hai,Aur kuchh baaten wajib hain, unko jaan bujh kar chhorne wala gunah-gaar hoga aur namaz phir se padhna wajib hoga.Aur agar bhool se chhot jaae to sajda sahu kar lene se namaz ho jaaegi.Aur kuchh baate sunnat hain aur kuchh baate mustahab hain.
Share.........

Related Topics

Namaz ki ahmiyat wa fazilat Namaz ke sharayat wa faraaiz Namaz ke wajibaat aur sunnaten Namaz ke makruhaat aur mufsidaat Sajda sahu ke masaail Qiraat me galti ke masaail Musaafir ki namaz ka bayan Bimar shakhs ki namaz ka bayan Namaz-e-Taraweeh ke masaail Namaz Tahiyatul wazu aur Masjid Namaz-e-Ishraaq aur Chaasht Namaz-e-Tauba aur Tahajjud Salatut Tasbeeh Namaz-e-Hajat Namaz-e-Istikhaara Eid ki namaz Suraj gahan aur chand gahan ki namaz Namaz-e-Janaza ke masaail