حضرت ابو سعید خدری رضی اللہ عنہ بیان کرتے ہیں کہ حضور صلی اللہ علیہ وسلم جنات سے اور انسانوں کی نظر سے پناہ مانگا کرتے تھے یہاں تک کہ سورہ فلق اور سورہ والناس نازل ہوئیں،پھر آپ صلی اللہ علیہ وسلم نے ان سورتوں کو پڑھنا شروع کر دیا اور ان کے علاوہ[دوسرے کلمات ] کو چھوڑ دیا۔ [ترمذی،کتاب الطب،باب ماجاء فی الرقیۃ بالمعوذتین ،حدیث:۲۱۹۸]
حضرت عابس جہنی رضی اللہ عنہ سے روایت ہے،حضور اکرم صلی اللہ علیہ وسلم نےارشاد فرمایا: ائے ابن عابس ! میں تمہیں وہ کلمات نہ بتاؤں جو[شریر جنات اور نظر بد سے]اللہ تعالیٰ کی پناہ طلب کرنے میں سب سے افضل ہیں؟ انہوں نے عرض کیا: یا رسول اللہ صلی اللہ علیہ وسلم ،کیوں نہیں۔[آپ ضرور بتائیے] آپ صلی اللہ علیہ وسلم نے فرمایا: وہ کلمات یہ دونوں سورتیں ہیں۔قل اعوذبرب الفلق اور قل اعوذ برب الناس۔[سنن نسائی،کتاب الاستعاذہ،حدیث:۵۴۴۹]